Од 15 март намалени цените на 202 лека

lekovi

Од 15 март ќе бидат намалени цените на 202 лека од кои 92 се иновативни, а останатите 110 се генерички лекови. 

 

Станува збор за трето по ред намалување на цените на лековите по донесување на новата методологија за утврдување на максималните цени на лекови во државата. Во Македонија се постави кредибилен систем за регулирање на цените на лековите кој функционира и дава резултати.

Ова пред една недела го најави министерот за здравство Никола Тодоров, кој рече дека третото по ред намалување на цените на лековите е сериозна потврда за тоа дека е поставен одличен систем за регулација на цените на лековите и оти тој систем е реално имплементиран, функционира и не зависи повеќе од волјата на еден човек или на оние кои го управуваат тој систем.

Најдобар доказ за тоа, посочи министерот, се повеќе од 1.800 лекови чии цени се намалени во овој период од донесувањето на методологијата за максимални цени до денеска.

– Оваа методологија која ја имаме многу скоро ќе почне да се применува и од многу држави во регионот и пошироко имајќи предвид дека станува збор за многу кредибилен процес и добро осмислена методологија која е имплементирана и фукционира без при тоа да имаме проблем со повлекување определени лекови од пазарот, недостиг на определени лекови од една страна, но и од друга страна да оневозможиме многу сериозни маржи, заработки, рече Тодоров додавајќи дека донесување на оваа методологија претставува една од клучните мерки за сериозна борба против корупцијата во здравството.

Според министерот, станува збор за мерка која е во директна корелација во намалување на можноста за корупција во здравството.

– Процентуалното намалување на големопродажните цени на лекови изнесува од 1 до 66 проценти кај дел од лековите или просечното намалување на цените изнесува 16,04 проценти за иновативните лекови. Процентуалното намалување на малопродажните цени се движи од еден до 64,53 проценти или просечно малопродажните цени се намалуваат за 15,72 проценти. Вкупната заштеда кај иновативните лекови (согласно прометот кој го имале во 2012 година) на годишно ниво ќе изнесува околу 800 илјади евра, истакна Тодоров.

Забележително намалување има и кај генеричките лекови.

– Процентуалното намалување се движи од еден до 57 проценти или во просек 12 проценти кај големопродажните цени на генеричките лекови, додека процентуалното намалување на малопродажните цени на генеричките лекови се движи од еден до 54,21 процент или во просек 10,5 проценти. Вкупната заштеда од овие лекови (согласно прометот кој го имале во 2012 година) ќе изнесува околу 1,6 милиони евра, потенцира Тодоров.

Министерот како пример го наведе лекот против алергија Aerius во таблети – 10 по 5 милиграми, чија цена се намалува од 245 на 106 денари или намалувањето е 56,14 проценти.

Се намалуваат цените на лековите за речиси сите фармодинамски подрачја, но најмногу кај оние за онколошки заболувања, лекови против алергија, за белодробни заболувања, за остеопороза, хормони, за емотивни заболувања.

Директорот на Бирото за лекови Илчо Захариев рече дека лекот Темодал, препарат кој е значаен за лекување на карциноми на мозокот, сега е многу подостапен за пациентите.

Посочи дека за лекот Темодал 5 капсули од 250 милиграми големопродажната цена се намалува од 51.530 денари на 17.505 денари или намалувањето е 66 проценти, а на 5 капсули од истиот лек по 100 милиграми, цената се намалува од 18.739 на 8.000 денари или намалувањето е 57,3 проценти.

– Се намалуваат цените на лековите за кардиваскуларни заболувања, дел од антибиотиците, препарати за лекување на гастро заболувања итн. Ниту една компанија и во октомври и сега не најави повлекување на некој препарат. Тоа покажува дека системот навистина добро функционира и лекови има доволно. Ниту една компанија во овој момент го нема затворено претставништвото во Македонија, истакна Захариев.

Голем број соседни земји, додаде тој, Македонија ја земаа за референтна земја во делот на цените, што нас не охрабрува дека државата има добро разработен систем кој дава резултати – добра реформа, намалување на цените на лековите, нема дефицит, односно системот фуккционира беспрекорно.

 

Извор: МИА

http://www.mia.mk/mk/Inside/RenderSingleNews/33/103130346

1,942 Comments